रूखमा कार ठोक्किँदा पाँचजनाको मृत्यु

विदेश

सोमबार, असोज ८, २०८०

उमरिया, मध्य प्रदेश । भारतको मध्य प्रदेशको उमरिया जिल्लाको राजमार्ग ४३ मा सोमबार बिहान रूखमा एउटा कार ठोक्किँदा पाँचजनाको मृत्यु भएको छ ।

वीरसिंहपुर पाली थाना क्षेत्रमा सोमबार राति १२ः३० बजे दुर्घटना भएको हो । कारमा सवार पाँचजनामध्ये तीनजनाको घटनास्थलमै र दुईजनाको उपचारका क्रममा मृत्यु भएको प्रहरीले जनाएको छ ।

वीरसिंहपुर पाली प्रहरी चौकीका प्रमुख मदनलाल मारावीले भने, “शहडोल जिल्लाबाट कारमा आएका पाँचजना गत राति जिल्लाको एक ढाबामा खाना खाएर फर्किने क्रममा भएको दुर्घटनामा तीनजनाको घटनास्थलमा नै र दुईजनाको उपचारको क्रममा मृत्यु भएको छ ।”

घटनाको जानकारी पाएलगत्तै प्रहरी घटनास्थलमा पुगेको र घटनाको अनुसन्धान सुरु गरेको छ । मृतकको शव पोष्टमार्टमका लागि पठाइएको र त्यसपछि परिवारको जिम्मा लगाइने मारवीले बताए । रासस/एएनआई