पोखरा । नेकपा (एमाले)को भ्रातृसंगठन राष्ट्रिय युवा संघको नेतृत्व निर्वाचनबाट चयन गरिने भएको छ । निर्वाचन समितिले सूचना टाँस गर्दै सोमबार (जेठ १२) बिहान ८ बजेदेखि मतदान हुने जनाएको छ ।

प्रमुख निर्वाचन अधिकृत मदनप्रसाद तिवारीले जारी गरेको सूचनाअनुसार, आइतबार अपराह्न ४ः३० देखि ६ बजेसम्म उमेदवारको फाराम दर्ता गरिनेछ । आइतबारै साँझ साढे ६ देखि ६ः४५ सम्म प्रारम्भिक नामावली प्रकाशन, उमेदवारविरुद्ध उजुरी, उजुरीमाथि छानबिन र निर्णय साँझ ७ बजेसम्म सकाइनेछ ।

उमेदवारले नाम फिर्ता लिन चाहेको खण्डमा आइतबार बेलुका ८ बजेसम्म फिर्ता लिन सक्नेछन् । निर्वाचन समितिले राति सवा ८ बजे अन्तिम नामावली प्रकाशन गर्नेछ ।

सोमबार बिहान ८ देखि अपराह्न ४ बजेसम्म मतदान हुनेछ । विद्युतीय मेसिनबाट हुने मतदानलगत्तै मतगणना सुरु गरिनेछ । मतगणना सकिएपछि निर्वाचन परिणाम घोषणा हुनेछ । पोखरामा पहिलोपटक युवा संघको महाधिवेशन भएको हो ।

प्रधानमन्त्री एवं एमाले अध्यक्ष केपी शर्मा ओलीले जारी १०औँ महाधिवेशनबाट सर्वसम्मत नेतृत्व चयन गर्न शुक्रबार (जेठ ९) उद्घाटनसत्रमा आग्रह गरेका थिए । सर्वसम्मत नभए स्वस्थ प्रतिस्पर्धा गर्न उनले निर्देशन दिएका थिए ।

उद्घाटनपश्चात् बन्दसत्रबाट विभिन्न प्रतिवेदन पारित गरिएको छ । त्यसपछि नेताहरूले सर्वसम्मत नेतृत्व चयनको प्रयास थालेका थिए । वर्तमान अध्यक्ष क्षितिज थेबेलाई नै सर्वसम्मत अध्यक्ष बनाउन उनीहरू लागिपरेका थिए ।

युवा संघका इन्चार्ज राजीव पहारीदेखि पूर्वअध्यक्ष महेश बस्नेत, जनवर्गीय संगठनका इन्चार्ज भानुभक्त ढकाललगायत नेताहरू थेबेलाई नै सर्वसम्मत बनाउने प्रयासमा लागेका थिए । तर, हालका महासचिव सुमन पुरीले कुनै पनि हालतमा अध्यक्ष पद नछाड्ने अडान लिए ।

शनिबार साँझ थेबेदेखि पुरीसम्मका समर्थकले पोखरा सभागृहभित्र र बाहिर नाराबाजी गर्दै आफ्नो पक्षमा माहोल देखाउने प्रयास गरेका थिए । अरू पदका आकांक्षीले पनि सोही रणनीति अपनाउँदै नाराबाजी गरे । सर्वसम्मतको प्रयास असफल भयो ।

आइतबार (जेठ ११)सम्ममा युवा संघको नयाँ नेतृत्व चयन भइसक्नुपर्ने थियो । तर, सहमति सम्भव भएन । इन्चार्ज पहारीले सहमतिको प्रयास गर्दा केही बढी समय लागेको बताए ।

हालका उपाध्यक्ष महाराज गुरुङ, प्रकाश गौतम, कृष्णहरि केसी अध्यक्षको दौडबाट बाहिरिएका छन् । उनीहरू बाहिरिएसँगै थेबे र पुरी भिड्ने भएका छन् ।

थेबे महासचिव हुँदै संघको नवौँ महाधिवेशनबाट अध्यक्ष चुनिएका थिए । पुरी उपाध्यक्ष, महासचिव हुँदै हाल अध्यक्षमा दाबी गरिरहेका छन् । 

थेबेका पक्षमा ओलीदेखि उपमहासचिव पृथ्वीसुब्बा गुरुङ, भानुभक्त ढकाल, महेश बस्नेतलगायत नेता देखिएका छन् । पुरीलाई एमाले स्थायी कमिटी सदस्य कर्ण थापा, संघका पूर्वअध्यक्ष रमेश पौडेल, वचनबहादुर सिंह, विनोद ढकाललगायत नेताको समर्थन छ ।

पुरीले सामाजिक सञ्जालमा भिडियो पोस्ट गर्दै आफूलाई मतदान गर्न आग्रह गरेका छन् । “केपी शर्मा ओलीज्यूले जुन अडान लिनुभएको छ, हाम्रो कार्यदिशा, कार्यभार, आगामी कार्यक्रम सोहीअनुसार बन्नेछन् । हामी गतिशील संगठनमा छौँ, हामीमाझ निश्चित बोर्डरलाइन छ । हामी ४० वर्षे हदबन्दीमा छौँ । यो संगठनमा सबैले आफूले गर्न सक्ने इफोर्ट दिन पाउनुपर्छ । संगठनमा नेतृत्व जाममा रहनु हँुदैन भन्ने हाम्रो दाबी हो । तसर्थ, मेरो उमेदवारी सशक्त रूपमा रहनेछ,” उनले भनेका छन् ।

मतदाननिम्ति शनिबार राति ४५ विद्युतीय मेसिन ल्याइएको छ । महाधिवेशनमा एक हजार ७५० प्रतिनिधि छन् ।