काठमाडौं । इजरायलले ११ हप्ताको नाकाबन्दीपछि मानवीय सहयोग लिएका यूएनका पाँचवटा ट्रक गाजा पट्टीभित्र छिरेका छन् । यी ट्रकमा बच्चाको लागि आवश्यक खाद्य सामग्री पनि रहेको बीबीसीले जनाएको छ ।

यूएनका मानवीय सहयोग प्रमुखले यो कदमलाई स्वागतयोग्य बताए पनि यो युद्धग्रस्त क्षेत्रका २१ लाख प्यालेस्टिनीहरूको तत्काल आवश्यकताको तुलनामा यो नगन्य मात्रा भएको बताए । यसअघि गाजामा भोकमरीको खतरा बढ्दै गएको चेतावनी दिइएको थियो ।

प्रधानमन्त्री बेन्जामिन नेतन्याहूले अमेरिकी सिनेटका सहयोगीहरूको दबाबपछि न्यूनतम मात्रामा खाद्यान्न गाजाभित्र छिर्न अनुमति दिएको बताए ।

उनले भिडियो सन्देशमा भने, “हामीले व्यावहारिक र कूटनीतिक दुवै दृष्टिकोणले भोकमरीको अवस्था आउन दिन हुँदैन ।” यो निर्णयले इजरायलभरी आलोचना भएपछि उनले यो टिप्पणी गरेका हुन् ।

नेतन्याहूले अमेरिकाले समर्थन गरेको तर यूएनले अस्वीकार गरेको योजनाअन्तर्गत इजरायली सेना र निजी कम्पनीहरूले सहयोग वितरण गर्ने केन्द्रहरू स्थापित नगरेसम्म मात्र यी खाद्य वितरण जारी रहने बताए ।

उनले इजरायली सेनाले आइतवारदेखि सुरु गरेको हमासविरुद्धको विस्तारित जमिनमार्फतको आक्रमणअन्तर्गत गाजाका सबै क्षेत्रहरू नियन्त्रणमा लिने पनि घोषणा गरे ।
यसैबीच, सोमबार गाजामा गरिएको इजरायली हवाई आक्रमणमा कम्तीमा ४० जनाको मृत्यु भएको प्राथमिक प्रतिकार्यकर्मी र अस्पतालहरूले जनाएका छन् ।

गाजाको मध्यभागमा रहेको नुसेइरात शरणार्थी शिविरमा विस्थापित परिवारहरूको आश्रयको रूपमा प्रयोग हुने विद्यालयमा गरिएको एक आक्रमणमा पाँचजनाको मृत्यु भएको बताइएको छ । बीबीसी