काठमाडौं । रौतहटमा आठ वर्षीया बालिका र १५ वर्षीया किशोरीलाई बलात्कार गरेको आरोपमा दुईजना पक्राउ परेका छन् ।

आठ वर्षीया बालिकालाई बलात्कार गरेको आरोपमा गुजरा नगरपालिका–८, जयराजपुर बस्ने ४६ वर्षीय एजाजुल साइ फकिरलाई आइतबार दिउँसो प्रहरीले पक्राउ गरेको छ ।

सोही नगरपालिका–८, जयराजपुरस्थित झुपडी घरमा ती नाबालिकालाई गत जेठ २८ गते दिउँसो फकिरले बलात्कार गरेको उजुरीको आधारमा इलाका प्रहरी कार्यालय चन्द्रनिगाहापुरबाट खटिएको प्रहरीले उनलाई पक्राउ गरेको हो ।

यसैगरी १५ वर्षीया किशोरीलाई बलात्कार गरेको आरोपमा वृन्दावन नगरपालिका–१ बस्ने ५० वर्षीय किशोरी राउतलाई आइतबार दिउँसो प्रहरीले पक्राउ गरेको छ ।

स्थानीय मेडिकलमा औषधि लिन गएको अवस्थामा ती किशोरीलाई राउत र सोही ठाउँ बस्ने १९ वर्षीय लालु जैसवाल समेतले बलात्कार गरेको भन्ने उजुरीको आधारमा इलाका प्रहरी कार्यालय गरुडा र प्रहरी चौकी विश्रामपुरबाट खटिएको प्रहरीले राउतलाई पक्राउ गरेको हो ।

साथै घटनामा संलग्न हाल फरार जैसवालको प्रहरीले खोजी गरिरहेको छ ।