विराटनगर । सप्तकोसी नदीमा पानीको बहाव बढ्दा उदयपुरसँगै सप्तरी र सुनसरीका पालिकाहरू बढी जोखिममा रहेका छन् ।

अहिले प्रदेश नम्बर–१ का आन्तरिक मामिला तथा कानुनमन्त्री केदार कार्की र भौतिक पूर्वाधारमन्त्री हिमाल कार्की प्रभावित क्षेत्रमा पुगेका छन् । तीनै जिल्लाका प्रमुख जिल्ला अधिकारीहरूसहित सुरक्षा अधिकारीहरू पनि साथमा छन् । 

सप्तरीको सप्तकोसी नगरपालिकाका प्रमुख कृष्णप्रसाद ढकालका अनसार बाढीले सप्तकोसीका ६ र ७ नम्बर वडामा प्रत्यक्ष असर गर्न सक्छ । “सप्तकोसी नगरपालिकाका ३, ६, ७, ८, ९ र १० नम्बर वडामा प्रभाव पर्छ । त्रियुगा नदीको किनारमा पर्ने वडाहरू हुन् । नदीमा गएर यो पानीको बहाव मिसिन गयो भने पानीको बहाव खोलिएर सप्तकोसी नगरपालिकाका ६ र ७ नम्बर वडामा प्रत्यक्ष रूपमा असर पर्न सक्छ । यसका लागि हामीले ‘अलर्ट’ गराइसकेका छौँ,” ढकालले भने ।

यस्तै, सप्तरीकै कञ्चनरूप नगरपालिकामा पनि १, २, ४, ५, १० वडामा असर गर्ने प्रमुख ललनप्रसाद गुप्ताले बताए ।

सुनसरीको बराह क्षेत्र नगरपालिकाका प्रमुख रमेश कार्कीले वडा नम्बर–६ र ९ मा असर पर्ने भएकाले हाई अलर्टमा राख्न आग्रह गरिएको बताए ।

उता, उदयपुरको बेलाका नगरपालिकाका–३, ५ र ८ नम्बर वडामा गरी करिब एक हजार घरपरिवार प्रभावित हुने जनाइएको छ । भँगालो बस्तीमा पसेसँगै स्थानीयलाई डुंगा र ट्युबबाट उद्धार गरिँदै छ ।

कोसी नदीको भँगालो आज बिहान करिब ४ बजे उदयपुर, सप्तरी र सुनसरीका बस्तीतर्फ पसेको हो । उदयपुरको बेलका–८, डुम्म्रिबोटेबाट बाढीको भँगालो बस्तीमा पसेको उदयपुरका प्रमुख जिल्ला अधिकारी वीरेन्द्रकुमार यादवले जानकारी दिए ।

बेलका–३, भाटेपुल बस्तीतर्फ छिरेको कोसीको थप तस्बिर हेर्नोस्–