काठमाडौं । शीर्ष स्थानमा आसीन गुजरात टाइटन्सले इन्डियन प्रिमियर लिग (आईपीएल)मा प्लेअफ दौडबाट बाहिरिइसकेको लखनऊ सुपर जायन्ट्ससँग ३३ रनको हार व्यहोरेको छ ।

बिहीबार अहमदाबादस्थित नरेन्द्र मोदी क्रिकेट रंगशालामा पाहुना टोली लखनऊले २३६ रनको लक्ष्य प्रस्तुत गरेको थियो । जवाफमा गुजरातले २० ओभर नै ब्याटिङ गर्दै नौ विकेट गुमाएर २०२ रन मात्र बनाउन सक्यो ।

गुजरातका शाहरुख खानले २९ बलमा पाँच चौका र तीन छक्कासहित ५७ रन बनाए । शेरफन रदरफोर्डले ३८, कप्तान शुभमन गिलले ३५, जस बट्लरले ३३ र साई सुदर्शनले २१ रन जोडे ।

लखनऊका विलियम ओ‘रोर्कले तीन विकेट लिए । आवेश खान र आयुष बदोनीले समान दुई विकेट लिए । शाहबाज अहमद र आकाश सिंहले एक/एक विकेट लिए ।

त्यसअघि, टस हारेर ब्याटिङको निम्तो पाएको लखनऊले २० ओभरमा दुई विकेट गुमाएर २३५ रन बनाएको थियो ।

लखनऊका मिचेल मार्शले ६४ बलमा १० चौका र आठ छक्कासहित ११७ रनको शतकीय इनिङ खेले । निकोलस पुरनले २७ बलमा पाँच छक्का र चार चौकासहितले अविजित ५६ र एडेन मार्करमले ३६ रन बनाए ।

गुजरातका अर्शद खान र साई किशोरले समान एक विकेट लिए ।

हारका बाबजुद १३ खेलबाट १८ अंकको गुजरात शीर्ष स्थानमा कायम छ । लखनऊ समान खेलबाट १२ अंकका साथ छैटौँ स्थानमा छ । प्रतियोगितामा गुजरातले प्लेअफमा स्थान सुरक्षित गरिसक्दा लखनऊ शीर्ष चारको दौडबाट बाहिरिइसकेको छ ।