काठमाडौं । नेपाल पुलिस क्लब वीरगञ्जमा जारी दोस्रो वीरगञ्ज गोल्डकप प्रतियोगिताको सेमिफाइनलमा प्रवेश गरेको छ । वीरगञ्जको आदर्शनगर रंगशालामा सोमबार भएको खेलमा पुलिस क्लबले वाग्मती युवा क्लब, सर्लाहीलाई २–१ गोल अन्तरले हराएको हो ।

खेलको १६औँ मिनेटमा पुलिस क्लबका मनीष सेढाईले उत्कृष्ट गोल गर्दै खेलमा आफ्नो टोलीलाई अग्रता दिलाएका थिए । विवेक पाण्डेको उत्कृष्ट पासमा सेढाईले हेडिङमार्फत गोल गरेका थिए ।

यस्तै, खेलको २६औँ मिनेटमा वाग्मती युवा क्लबका भुपाल मगरले गोल गरेका थिए । यसैगरी खेलको ७६औँ मिनेटमा पुलिस क्लबका कप्तान रामचन्द्र वाजीले उपलब्ध गराएको पासको सदुपयोग गर्दै सोही क्लबका उज्ज्वल राईले दोस्रो गोल गर्दै आफ्नो टोलीलाई सेमिफाइन प्रवेश गराएका थिए ।

सेमिफाइनमा अब पुलिस क्लबले आयोजक वीरगञ्ज युनाइटेडसँग प्रतिस्पर्धा गर्नेछ । यही फागुन १७ गतेदेखि सुरु भएको वीरगञ्ज गोल्डकप फागुन २४ गतेसम्म चल्ने छ । प्रतियोगिताको विजेताले ११ लाख ११ हजार एक सय एघार तथा उपविजेताले पाँच लाख ५५ हजार ५५५ पुरस्कार पाउने छ । प्रतियोगिताको सर्वोकृष्ट खेलाडीलाई स्कुटर प्रदान गरिनेछ । उत्कृष्ट गोलरक्षक र उत्कृष्ट प्रशिक्षकलाई जनही २० हजार पुरस्कार प्रदान गरिनेछ ।