काठमाडौं । प्रमुख प्रतिपक्ष दल नेपाली कांग्रेस सांसद कुसुम थापाले बाल संगठनको उचित व्यवस्थापन गर्न सरकारको ध्यानाकर्षण गराएकी छन् । उनले शारीरिक तथा मानसिक अशक्त बालिगको स्थानान्तरण तथा व्यवस्थापन गर्ने सन्दर्भमा सरकारलाई आवश्यकता  बमोजिमको स्पष्ट नीति, तर्जुमा निर्माण गर्न समेत ध्यानाकर्षण गराएकी छन् ।

मंगलबारको प्रतिनिधिसभा बैठकको शून्य समयमा बोल्दै उनले असक्षम बालबालिकालाई विशेष संरक्षण दिनु राज्यको दायित्व भएको बताइन् । बालबालिकाको अधिकारलाई संविधानमा समेटेर बालबालिकासम्बन्धी ऐन २०७५  कानुन निर्माण गरेको भन्दै उनले असहाय बाल-बालिकाहरू बालिग भइसकेपछि कता स्थानान्तरण गर्ने भन्ने समस्या रहेको बताइन् ।

“उचित व्यवस्थापन एवम्  संरक्षण कसरी गर्ने भन्ने विषयमा हामीसँग स्पष्ट नीतिको अभाव रहँदा सरकारको मातहतमा रहेको बाल संगठनमा अहिले १९ देखि ५४ वर्षका बालिगहरू समेत रहेका छन् । जसले गर्दा बाल संगठनलाई आर्थिक भार र थप जिम्मेवारी त थपिएकै छ त्यससँगै  राज्यले विशेष संरक्षणमा राख्नु पर्ने असहाय बालबालिकाको अधिकार अहिले चपेटोमा परेको छ, बालबालिकाको स्याहारसुसार र संरक्षणमा असर परेको छ‚” उनले भनिन् ।

उनले बालबालिकासम्बन्धी कानुनको प्रमुख सिद्धान्त, बालबालिकाको सर्वोत्तम हितलाई सम्बोधन हुने गरी नीतिगत स्पष्टताको आवश्यकता रहेको बताइन् ।