
काठमाडौं । लकडाउनका कारण काठमाडौंमा समस्या भएपछि सयौँ नागरिक चन्द्रागिरीको त्रिभुवनर्पाकमा पुगेका छन् ।
चन्द्रागिरी नगरक्षेत्रका जनप्रतिनिधिको पहलमा शनिबार सातवटा बसमा समस्यामा परेका विभिन्न जिल्लाका नागरिकहरुलाई पठाइदिएपछि आज पनि सयौँको संख्यामा त्यहाँ सर्वसाधारण पुगेका छन् ।
तर स्थानीय तहले अहिले यसरी पठाउन र खान बस्न दिन नसकिने बताएको छ ।
“हामीले साच्चै अप्ठेरोमा परेका मजदुरवर्गलाई सहयोग गरेका हौँ,” वागमती प्रदेशसभा सदस्य रमा आले मगरले बाह्रखरीसँगको कुराकानीमा भनिन्, “तर आज काठमाडौंमै पनि डेरा भएका र डेरामा बस्न समस्या नभएका पनि आएको पायौँ । यसरी सबैलाई हामीले पठाउनै सक्दैनौँ ”
विभिन्न क्षेत्रका नागरिक अभियानले त्रिभुवनपार्क पुग्नेहरुको व्यवस्थापन गर्दै आएको थियो । तर अहिले नजिक घर भएका पनि आउने थालेपछि समस्या भएको उनीहरुको गुनासो छ ।
अभियानमा खटिएका अगुवाहरुले आज पनि कम्तिमा २५० जना नागरिक जम्मा भएको उल्लेख गर्दै नजिक हुनेहरुलाई घर फर्किदिन आग्रह गरेको छ भने जो रामेछाप, दोलखा, सिन्धुपाल्चोकलगायतका जिल्लाबाट आएका छन् उनीहरुलाई मात्रै त्यहाँ बस्ने व्यवस्था गर्ने र भोलिका दिनमा कसरी पठाउन सकिन्छ भन्नेबारेमा छलफल गर्ने बताएका छन् ।
शनिबार विभिन्न जिल्लाबाट आएका ३०२ जनालाई सातवटा बसमा पठाइएको थियो ।
“यहाँ आउने सबैलाई पठाउँछन् भन्ने म्यासेज सञ्चारमाध्ममा गयो,” आले मगरले भनिन्, “त्यस्तो होइन, जो नजिकको हुनुहुन्छ, काठमाडौंमा डेरा छ उहाँहरु आफ्नै कोठामा बसिदिनूस् । एकदमै समस्यामा परेकालाई मात्रै हामीले शनिबार सहयोग गरेका हौँ । सबैलाई होइन ।”
नजिक हुनेहरुलाई आफ्नो कोठामा सुरक्षित बसिदिन उनको आग्रह थियो ।
नजिक बस्ने व्यवस्था हुनेहरुलाई जनप्रतिनिधिले आफ्नै ठाउँमा फर्किन र खाने व्यवस्थाका लागि वडाका लागि अनुरोध गर्ने आश्वासन दिएका छन् ।