क्रिकेटको तयारी सुस्त, कुन खेलको तयारी कहाँ हुँदैछ ?

खेल

साग विशेष

क्रिकेटको तयारी सुस्त, कुन खेलको तयारी कहाँ हुँदैछ ?

मंगलबार, साउन २१, २०७६

क्रिकेटको तयारी सुस्त, कुन खेलको तयारी कहाँ हुँदैछ ?

काठमाडौं । १३ औं दक्षिण एसियाली खेलकुद (साग) आयोजनाको जिम्मेवारी पाएको नेपालले तयारी तीव्र पारेको छ । भौतिक पूर्वाधारको स्तरोन्नतिदेखि खेलाडी प्रशिक्षण सुरु भइसकेको छ । पूर्वाधारको कारण देखाउँदै पटक–पटक मिति सारिएको साग पूर्वाधारकै कारण नरोक्ने दाबीसहित नेपालले आन्तरिक तयारी तीव्र बनाएको छ ।

देशको प्रतिष्ठासँग जोडिएको साग समयमै सम्पन्न गर्न नेपाललाई पूर्वाधार नै मुख्य चुनौती रहेको छ । तर राष्ट्रिय खेलकुद परिषदको सदस्यसचिव रमेश कुमार सिलवाल चुनौती नभइ अवसर रहेको बताउँछन् । उनकै आधारलाई मान्ने हो पूर्वाधार निमार्णको काम कात्तिक १५ गतेभित्र सकिनेछ । २०७२ सालको विनासकारी भूकम्पपछि तङ्ग्रिन नपाएको दशरथ रंगशालाको स्तरोन्नति अन्तिम चरणमा छ । पोखरा रंगशाला र सातदोबाटोमा रहेको हिटिङ स्वीमिङ पुलको काम एकसाथ सकिने दाबीसहित सिलवाल आन्तरिक तयारीमा जुटेका छन् ।

तोकिएकै मितिमा साग भए २७ खेलमा प्रतिस्पर्धा हुनेछ । आयोजकको हैसियतले नेपालले प्याराग्लाडिङ, क्रिकेट, कराँते र गल्फ समावेश गरेको छ । घरेलु मैदानमा फाइदा उठाउने लक्ष्यमा रहेको नेपालले सबै खेललाई तयारीमा जुट्न निर्देशन दिइसकेको छ । २६ खेलको तयारी सुरु भइसके पनि पहिलोपटक समावेश क्रिकेटको भने प्रशिक्षण गर्ने मैदानको अभावमा तयारी हुन सकेको छैन ।

राष्ट्रिय टोली तयारी समितिका निर्देशक महेन्द्रकुमार राइले क्रिकेटको तयारी भदौबाट सुरु हुने बताए । उनले कीर्तिपुरस्थित त्रिवि क्रिकेट मैदानमा पिच र घाँस काट्ने काम भइरहेको र सकिनेबित्तिकै तयारी थालिने बताए । पाँच खेलको तयारी काठमाडौं उपत्यका बाहिर हुँदैछ भने अन्यको सातदोबाटो, लगनखेल, दशरथ रंगशालामा चलिरहेको छ ।

ह्यान्डबल र आर्चरी पोखरामा, बास्केटबल धरानमा, कुस्ती हेटौंडामा र खोखोको तयारी बर्दियामा भइरहेको छ । आर्चरीको एक टोली जापानमा पनि प्रशिक्षण गरिरहेको छ ।