'सामाजिक सञ्जालमा केटी बनेर रेस्टुरेन्टमा बोलाउँथे, पछि धम्की दिएर लाखौँ रकम माग्थे'

देश

बाह्रखरी बुधबार, साउन ३१, २०८०

'सामाजिक सञ्जालमा केटी बनेर रेस्टुरेन्टमा बोलाउँथे, पछि धम्की दिएर लाखौँ रकम माग्थे'

काठमाडौं । प्रहरीले 'अपरेसन हनी ट्र्याप'अन्तर्गत दुईजनाई पक्राउ गरेको छ । पक्राउ पर्नेमा सिन्धुलीको कमलामाईकी आसिका रजल मगर र दोलखा भिमेश्वरका राजु खत्री रहेका छन् ।

प्रहरीका अनुसार उनीहरूले सामाजिक सञ्जालको माध्यमबाट केटीको प्रयोग गरी पुरुषहरूलाई खाजा खाने बाहनामा रेस्टुरेन्टमा लगेर भेटघाट गर्ने गरेका थिए । त्यसपछि पीडितहरूको घर ठेगाना, कार्यालय तथा सवारी साधनलगायतका सम्पूर्ण विवरणहरू डायरीमा संकलन गर्थे ।

सबै विवरण पाएपछि प्रत्यक्ष भेटघाट गरेर झुठा मुद्दा लगाएर फसाइदिने भन्दै पीडितलाई धम्की देखाएर मोलमोलाइ गरेर ठुलो रकम माग गर्ने गरेको पाइएको प्रहरीले जनाएको छ ।

प्रहरीले विभिन्न मितिमा ४० लाख बराबरको रकम उल्लेख भएका आठ थान चेक काट्न लगाएर रकम असुल गरेको घटनाका आधारमा पक्राउ गरेको हो ।