काठमाडौं । नेकपा एमालेका अध्यक्ष केपी शर्मा ओलीले पार्टीका दुईजना नेताहरुलाई ६ महिनाका लागि निलम्बन गरेका छन् ।

उनले सोमबार माधवकुमार नेपाल र भीम रावललाई पत्र पठाइ कारबाही गरेको जानकारी गराएका छन् ।

ओलीले पत्रमा अब पनि पार्टी विरोधी गतिविधि गरे थप कडा कारबाही गर्ने चेतावनी दिएका छन् ।

तर नेपालले भने यसलाई अस्वीकार गरिदिएको बताएका छन् । अध्यक्ष ओलीले कारबाही गरिसकेपछि नेता नेपालले ओलीले नै पार्टी छाडेर गए हुने प्रतिक्रिया दिएका छन् ।

बाह्रखरीका अक्षर काकासँग छोटो कुरा गर्दै उनले यस्तो बताएका हुन् ।

प्रस्तुत छ, नेता नेपालसँग गरिएको कुराकानीको अंश :

नेकपा एमालेका अध्यक्ष केपी शर्मा ओलीले तपाईंलाई कारबाही गर्नुभएको छ । अब कसरी अघि बढ्नुहुन्छ ?

उहाँको यो कारबाहीलाई पूर्णरुपमा अस्वीकार गर्छु । उहाँले नवौं राष्ट्रिय महाधिवेशनबाट निर्वाचित केन्द्रीय कमिटीलाई भंग गरेर अवैधरुपमा महाधिवेशन आयोजक कमिटी बनाउनुभयो । यो अवैधानिक भएकाले भ्रत्सना गर्दै पूर्णरुपमा अस्वीकार गर्दछु ।
यो उहाँको निरंकुश र स्वेच्छाचारी कृत्य हो । 

देशभरका कार्यकर्तालाई दृढतापूर्वक यसका विपक्षमा उभिन, विचलित नभइकन केपी ओली गुटको अवैधानिक कामका विरुद्धमा उभिन आह्वान गर्दछु ।

अब फरक पार्टी बनाएर संघर्ष गर्नुहुन्छ ?

अब देशव्यापीरुपमा गएर यही पार्टीलाई अघि बढाइन्छ । केपी शर्मा ओली असली एमाले होइनन् नक्कली एमाले हुन् । हामी असली एमाले हौँ ।

उहाँले त पार्टी छाडेर जान भन्नुभयो नि !

उनले छाडेर गए हुन्छ । हामी छाड्दैनौँ । 

कार्यकर्तालाई के भनेर आह्वान गर्नुभएको हो ?

अब जिल्ला जिल्लामा संगठन बढाउन कार्यकर्तालाई आह्वान गर्न चाहन्छु ।

अहिले केही कार्यकर्तामा निरासा पनि छाएको छ नि !

अहिले निरास हुने बेला होइन । समस्याहरु आउँछन् । बेला बेलामा निरंकुश प्रवृत्ति भएका व्यक्तिहरु आउँछन् । केपी ओलीको दक्षिणपन्थी, आत्मसमर्पणवादी सोचको कारणले समस्या आएको हो । उनमा अहंकार, दम्भ र उन्माद देखा परेको छ । पार्टीको कुनै माया छैन ।